鬼咁多要求既貴婦狗

唔知點解，疫情期間好多朋友都宣布有喜🤣👶🏻而屋企加添咗新成員，除咗夫婦二人嘅心理要作出調整之外，屋企嘅毛孩心態亦都要作出改變。 12歲嘅貴婦狗coffee（冇錯，情緒問題又係貴婦狗了🤡），自從屋企有咗BB之後，佢嘅行為越嚟越偏激怪異，除咗變到會整爛係尿布嘅報紙之外，仲成日都會沖去工人姐姐嘅床下底。重點係其實印尼姐姐係怕狗，屋企係用咗好多野黎圍住工人姐姐間房，如果長此落去會令屋企運作出現問題。

——第一次傾計——— 🐶：我唔覺得自己係唔舒服，只係覺得佢哋脾氣對我越嚟越大聲同埋惡！都唔知我做錯乜，好似好多嘢都唔滿意我咁，但其實我不嬲都係咁㗎啦！其實我入嚟呢度住咗好耐，有咩理由個個都鬧我？而家冇地方好瞓，我只係相信姐姐，姐姐只會唔出聲，或者唔敢出聲！佢打工，唔會係屋企惡。 👩🏻‍⚕➡️🤱🏻：我懷疑佢唔會再喺廳個狗竇度瞓係因為覺得熱。喺你間房開着冷氣瞓又會覺得凍，所以瞓瞓下就會走去第二度。不如你試吓搬個狗竇入去你間房，咁樣個溫度對佢來講可能會舒服啲。

——第二次傾計——— 👩🏻‍⚕️：你今日成日都做得好好，好乖喎！但係做乜鬼啱啱要喺媽咪張床到屙尿啊？ 🐶：係呀今日我好開心，佢哋個個都好錫我好注意我，一返屋企都比零食我，仲比以前好添！偏偏係媽咪一返到嚟就咁冷淡咁對我，仲要惡我，又唔比零食我，我就忍唔住跳上去話佢知咁樣我會唔開心！依家佢返到屋企就好忙好多嘢趕住做咁，我唔再係佢第一個想要見到架啦😡👶🏻我都好想大家好似以前咁咁溫柔生活，我都會唔開心㗎嘛！我再試吓夾下啦。 ———————

我哋見到coffee咁鬼多要求，都覺得同佢繼續講落去係嘥氣。所以就開始幫佢做治療舒緩下情緒嘅問題，隔咗日我哋再follow up嘅時候，媽咪已經話佢又回復正常返。原來嗰日夜晚媽咪已經衝破咗爆發嘅臨界點，狠狠咁樣鬧咗coffee一餐，嚇到佢淆晒底😂我哋都叫媽咪之後氹coffee，承諾咗佢一啲野，等佢唔好咁唔開心。 今次算係處理毛孩情緒問題比較快嘅一次，因為其實動物嘅心思都係非常之細膩，微小嘅改變已經可以左右到佢情緒嘅起伏。除咗治療可以舒緩佢哋精神上嘅唔舒服，最主要都係家人對佢哋嘅溝通與關懷。