淘氣貴婦老人家

貴婦狗不嬲都好有態度嘅品種。今次哩隻貴婦—細佬，雖然已經係14歲高齡，但依然好有個性😂 話說細佬嘅同屋住啱啱離世，佢就開始唔食嘢。媽咪都以為細佬係因為情緒唔好，唔開心所以先唔食，但係安全起見都帶咗佢去睇醫生。醫生檢查到細佬嘅胰臟有少少問題，但係唔嚴重嘅，就俾咗啲開胃嘅藥細佬食，但係情況仍然冇改善。 媽咪嘅朋友係charmaigne 嘅同事（阿A），都識得同動物傳心溝通，所以同細佬好friend。由於有溝通嘅歷史，所以媽咪同埋阿A都好錫同埋好縱細佬嘅。雖然咁樣講，但係細佬唔肯食嘢嘅問題始終都冇解決，所以阿A就轉介咗比我哋。

我哋除咗對細佬嘅胰臟進行遙距能量治療之外，亦都同細佬傾吓計，作心靈輔導。 ———————————————— 👩🏻‍⚕️：細佬，你做乜成日唔食嘢啊，係咪唔舒服啊？ 🐶：其實我好肚餓㗎 ！不過我真係好怕嘔返出嚟嗰個感覺，又怕自己唔夠能力消化，入面郁得好慢，如果食啲硬嘢，乾身嘢，凍嘢嘅話可能又會嘔返出嚟。 👩🏻‍⚕️：我哋會試吓叫屋企人煮第二啲嘢俾你亂下肚仔，所以唔使驚架！唔食嘢會影響健康，又要睇醫生，媽咪又會唔開心。係咪你同屋住走咗所以你唔開心啊？ 🐶：明白，我會試吓食少少，不過唔好再逼我，我咁大個自己有分數。我知道佢走咗啦，有另一個姐姐同我講咗啦！放心喎，我冇好失落，我咁大個識面對，阿媽教得好好。 ——————————————————————— 我哋都叫媽咪試下煲粥仔畀細佬食，但係媽咪試過煲魚粥、雞粥仔、豬肉粥，細佬都唔肯食嘢，淨係食幾啖零食就一日咁。但係根據我哋嘅能量治療，細佬個肚仔其實真係唔係嚴重，而且我哋嘅對話入面，細佬根本冇提過佢掛住以前嘅朋友仔所以唔食嘢，但係佢點解就係唔肯食嘢呢？ ！即係扭計啦！又浪費咗媽咪嘅心機，又浪費咗咁多嘅食物😡

之後我哋決定唔再同細佬傾偈住， 我哋主力做治療先，希望能夠幫佢舒緩情緒，同埋身體嘅唔舒服。配合埋媽咪買咗濃味肉汁味嘅營養膏溝落正餐到，細佬開始一兩啖咁食。 阿A見到細佬開始食返野，就走去同佢傾偈，讚下佢。奇怪的邏輯增加了！細佬好似打開咗新世界嘅大門咁，知道唔食嘢之後食返少少都會有人讚，佢竟然 又 開 始 唔 食 嘢 啦！🤬

我哋知道咗佢同阿A講🐶：「媽咪而家錫晒我，不過要食開胃藥胃口唔係咁好。」嘩咁囂張嘅🤯唔可以咁樣架喎！一於再同佢傾偈啦！ ——————————————————————— 👩🏻‍⚕：聽講呢幾日你都有食嘢喎，不如分享吓 ️🐶：我鍾意食偏向濃味嘅零食，係冇益，但又真係好好味，冇理由唔食㗎 ！條脷好似會幫我揀嘢食咁，哈哈，激死呀唔關我事㗎 ！ 👩🏻‍⚕：但係如果咁樣再老啲嘅時候就只能夠食啲勁冇味嘅嘢食㗎啦，因為你已經食晒啲quota啦！再係咁樣就會成日去見醫生，你都唔開心係咪！ 🐶：一陣啲嘢食可唔可以落少少味啊？ 👩🏻‍⚕：你自己諗吓啦，媽咪每日準備咁多嘢俾你食，你就每日都咁樣試佢哋嘅底線，媽咪錫你，但係你都要錫返媽咪㗎 ！分清楚自己身份同埋位置，你咁樣做唔係錫媽咪嘅表現。 🐶：⋯⋯我明㗎啦，我自己再諗啦，我知我要得太多，但我真係錫媽咪，我見到佢真係付出，唔應該咁樣整佢，希望我個肚仔快啲好返，可以食得好啲啦。 ——————————————————————— 哎呀！我就真係比呢隻傻豬嘅狗激死啦！係要我哋叫媽咪發脾氣先知驚嘅！我哋叫媽咪試吓冷落一下佢，挫一挫佢嘅銳氣，令佢知道自己應該係一個乜嘢嘅位置度。之前就話自己條脷好似識幫佢揀嘢食咁，到媽咪開始唔理佢，就開始自己慢慢食返正餐，連白飯都食🤡 不過都知老人家有時候嘅心事就好似小朋友一樣，淘氣頑皮，我哋團隊入面開咗盤估佢之後又會唔會用返呢啲招數黎刷存在🤣有時候就尊敬下呢啲可愛嘅老人家啦！