分離焦慮症

最近多咗時間係屋企，多咗時間陪伴自己嘅毛小孩，有時喺度諗，疫情過咗之後毛孩唔知會唔會唔習慣呢？尤其是係一啲有分離焦慮症嘅毛孩，有時都會擔心佢哋之後會唔會嚴重咗😿

今次呢一隻還有分離焦慮症嘅狗狗叫做樂樂，佢1個多月大嘅時候，如果淨係自己一個獨留家中，會不斷咬爛晒物品及傢俬，即至半歲左右，寵主養多一隻狗陪佢，再加上當時我哋都有開解下樂樂，情況先至得以改善。直至今年年頭，樂樂搬屋之後分離焦慮症再度復發，會不停吠同咬爛傢俬，破壞力非常驚人。所以寵主決定再搬去一個新環境，希望透過溝通，令樂樂唔再出現破壞嘅行為。

🐕：我唔飽啊！食嘅份量根本唔夠我用，我極度肚餓先至會不斷攻擊屋企，攻擊完我就會攰，攰就可以瞓覺休息，瞓咗就唔餓啦！不如你試吓周圍放啲長糧喺度，比我周圍係屋企搵黎食，咁我就可以好似人哋啲肥狗咁，食飽就瞓！冇足夠嘅嘢食只會令我更快破壞間屋！希望明白我嘅身形同埋品種係要食好多！

一問之下，樂樂分離焦慮症復發嘅誘因竟然係因為唔飽！我哋即刻問寵主關於樂樂嘅飲食習慣，寵主開頭都唔太了解點解樂樂會唔飽，跟返平時負責餵飼樂樂嘅爸爸，先知道原來爸爸係俾錯咗幼年犬專用狗糧俾樂樂食，作為成年犬嘅樂樂當然唔飽啦！🙀

樂樂帶着新嘅糧食，搬咗去新嘅環境，三個禮拜之內都唔再吠，冇咬野，非常乖豬！