煙霧下的元朗

8月5日對住係元朗嘅貓咪爽爽黎講，可能係佢貓生最辛苦嘅一日。嗰日爽爽媽咪返到屋企，見到爽爽坐咗係地下不停咳，當唔咳個時就不停舔自己。自從嗰日開始，爽爽嘅情況一路惡化，連飲水都會咳，而有啲部位嘅皮膚亦都開始甩毛。

媽咪見到咁樣就約咗醫生睇皮膚科，醫生嘅解說就係身體上面有痛楚或者敏感，就會出現呢一個情況，當其時個肺係冇任何情況，而皮膚亦唔係生廯。但係爽爽嘅情況一路喺度惡化，直到10月5日，終於確診為肺炎。醫生話雖然唔危險，但係非常嚴重，爽爽個肺非常花。

10月28日，我哋正式接咗爽爽哩個個案。得知佢每一日都要食抗生素，同埋吸霧化藥，聞藥嘅時候掙扎得好犀利。爽爽完全冇鼻涕同埋傷風流鼻水嘅問題，而且每一次飲水都會咳，所以爽爽飲少咗好多水，唔能夠順利排便。當晚我哋進行治療之後，爽爽聞藥嘅時候明顯冇平時咁掙扎。係個晚，爽爽總共嘔咗三次，嘔出嚟嘅係一啲橙色嘅液體。

第二朝爽爽明顯精神好咗好多，冇成日瞓覺或者趴喺度好似好攰咁，最重要係爽爽飲水開始冇咳到！第二晚我哋亦都有幫爽爽做能量治療，開始嘅時候已經冇再掙扎，亦都感受到佢好乖好大力咁樣吸氣、呼氣，直到全身嘅毛孔擴張， relax咗一陣。突然，我感覺到爽爽話「夠啦」，就問媽咪爽爽個情況。原來爽爽已經開始掙扎，因為聞藥嘅過程係需要約20分鐘，但係對爽爽來講太長啦，所以每一次佢出嚟都會用一種好嬲嘅眼神望住媽咪。

之後幾日我哋都由幫爽爽不停調節身心嘅狀態，盡快將佢心跳過到嘅情況降返正常嘅速度。爽爽亦都開始恢復正常嘅生活，會衝去食糧，唔洗媽咪用針筒迫佢飲水，又跳去一啲舒適嘅位置，擺出高難度提腿動作等等。媽咪亦都開始感覺到摸爽爽嘅狀態輕鬆左好多，最重要嘅係過咗兩日爽爽終於終於有大便啦！

去到11月4日，又係爽爽覆診嘅日子啦！今次醫生話爽爽個肺終於冇雜音，但係由於肺炎係要喺康復之後再食多一個療程先可以定案，所以爽爽會喺下個禮拜先知道個肺仲有冇花。

人同動物一樣，吸入化學物質係會影響健康，在於我哋人類可以用自己嘅知識去等自己舒服啲，但係我哋身邊嘅毛孩完全冇呢一個知識，所以希望大家多啲留意身邊嘅動物，無論係自己嘅毛孩定係浪浪，佢哋都需要保護同埋救援。如果大家有任何需要，都歡迎大家繼續搵我哋，我哋一定會全力幫手。